Паёми табрикотии Директори Институти фалсафа ва сиёсатшиносии АМИТ, доктори илмҳои фалсафа, профессор Маҳмадизода Нозим Давлатмурод ба муносибати Рӯзи ҷавонони Тоҷикистон

Ҷавонони сарбаланд, худогоҳ ва саодатманди Тоҷикистони азиз!

Фарзандони бонангу номус ва ояндасозони миллат!

Бо эҳсоси баланди ифтихор, эҳтиром ва самимияти беандоза ҳамаи Шуморо ба муносибати Рӯзи ҷавонони Тоҷикистон самимона табрику таҳният гуфта, ба ҳар яки Шумо пеш аз ҳама саломатии бардавом, неруи қавии иродавӣ, саодати рӯзгор, комёбиҳои пайваста ва дастовардҳои шоистаро дар роҳи хизмат ба Ватани маҳбубамон орзу менамоям.

Рӯзи ҷавонон яке аз ҷашнҳои пурифтихору арзишманди миллӣ буда, рамзи эътимоди давлату ҷомеа ба неруи тавоно, хирадманд ва созандаи насли ҷавон мебошад.

Ҷавонон на танҳо қишри фаъоли ҷомеа, балки сутуни устувори давлатдорӣ, неруи пешбарандаи таҳаввулоти илмӣ, иҷтимоӣ ва фарҳангӣ ва кафили фардои ободу дурахшони Тоҷикистони соҳибистиқлол мебошанд.

Имрӯз, дар марҳилаи ҳассосу сарнавиштсози рушди давлатдорӣ, ки Тоҷикистон бо қадамҳои устувор ба сӯи пешрафт, навсозӣ ва таҳкими мавқеи худ дар арсаи байналмилалӣ ҳаракат мекунад, нақши ҷавонон аз ҳарвақта дида бештар муҳим ва тақдирсоз гардидааст.

Дар ҷаҳони муосир, ки бо рушди босуръати илму технология, рақобати шадиди иқтисодӣ ва тағйироти пайваста тавсиф меёбад, маҳз ҷавонони соҳибдониш, ватандӯст, худшинос ва дорои ҷаҳонбинии муосир метавонанд сарнавишти миллатро ба сӯи пешрафти устувор раҳнамоӣ намоянд.

Боиси ифтихор аст, ки ҷавонони кишвар имрӯз дар тамоми самтҳои ҳаёти ҷомеа илму маориф, варзиш, фарҳанг, ихтироъкорӣ, идоракунии давлатӣ ва ҳифзи амнияту суботи кишвар иштироки фаъолона дошта, бо заҳмати софдилона ва дастовардҳои арзишманд обрӯи Тоҷикистони азизро дар сатҳи миллӣ ва байналмилалӣ баланд мебардоранд.

Ҷомеаи муосир бештар аз ҳар вақти дигар ба ҷавонони боандеша, соҳибмаърифат, эҷодкор ва масъулиятшинос ниёз дорад. Зеро маҳз ҷавонон метавонанд бо неруи ақл, хирад ва навоварии худ заминаи рушди устувори иқтисодӣ, пешрафти илм, рақобатпазирии миллӣ ва таҳкими давлатдории миллиро таъмин намоянд.

Институти фалсафа ва сиёсатшиносии ба номи А. Баҳоваддинови Академияи миллии илмҳои Тоҷикистон ҳамчун маркази муҳими илмиву таҳқиқотӣ ва маърифатӣ тарбияи насли ҷавони худшинос, ватандӯст, дорои тафаккури таҳлилӣ, фарҳанги сиёсӣ ва ҷаҳонбинии илмиро яке аз вазифаҳои муқаддаси худ медонад.

Мо бар он боварем, ки ҷомеаи пешрафта танҳо бо ҳузури ҷавонони донишманд, соҳибкасб ва дорои масъулияти баланди шаҳрвандӣ метавонад ояндаи дурахшонро бунёд намояд.

Ҷавонони азиз!

Шумо ворисони тамаддуни куҳан, таърихи пурифтихор ва фарҳанги волои миллати тоҷик ҳастед. Бар дӯши Шумо ҳифзи арзишҳои миллӣ, эҳтироми муқаддасоти давлатдорӣ, арҷгузорӣ ба забони модарӣ, посдории анъанаҳои неки аҷдодӣ ва муаррифии фарҳанги асили тоҷикон дар арсаи ҷаҳонӣ қарор дорад.

Дар шароити ҷаҳонишавӣ, ки ҷомеаҳои ҷаҳон бо тағйироти амиқи илмӣ, сиёсӣ ва фарҳангӣ рӯ ба рӯ мебошанд, аз ҳар яки Шумо тақозо мешавад, ки бо омӯзиши илму донишҳои муосир, зеҳни сунъӣ, технологияҳои рақамӣ, барномасозӣ, таҳқиқоти илмӣ, соҳибкории инноватсионӣ, идоракунии муосир ва забонҳои хориҷӣ худро барои рақобати солим ва саҳмгузорӣ дар рушди Ватан омода созед.

Дар баробари дониш ва касбомӯзӣ, ахлоқи ҳамида, одоби муошират, эҳтироми падару модар, садоқат ба миллат, вафодорӣ ба Ватан, худшиносӣ, худогоҳӣ ва ваҳдати миллӣ бояд чароғи роҳнамои зиндагии ҳар як ҷавон бошад.

Ҷавоне, ки бо рӯҳи ватандӯстӣ, масъулиятшиносӣ ва худогоҳӣ тарбия ёфтааст, метавонад ҳомии сулҳу субот, посдори истиқлол ва бунёдкори фардои ободи кишвар гардад.

Мо бо ифтихор ва эътимоди комил ба ҷавонони тоҷик менигарем. Зеро Шумо насли созанда, насли дониш, насли маърифат ва неруи бузурги эҳёкунандаи арзишҳои миллӣ ва рушдбахши давлатдорӣ ҳастед.

Боварии комил дорем, ки ҷавонони сарбаланди Тоҷикистон минбаъд низ бо илму маърифат, хиради созанда, заҳмати содиқона ва муҳаббати самимӣ ба Ватан дар таҳкими сулҳу субот, пешрафти илм, рушди ҷомеа ва ободии Тоҷикистони азиз саҳми арзандаи худро мегузоранд.

Дар ин рӯзи фархунда бори дигар ҳамаи ҷавонони саодатманди кишварро самимона табрик гуфта, ба ҳар яки Шумо саломатии устувор, иродаи қавӣ, тафаккури созанда, маърифати баланд, иқболи нек, саодати зиндагӣ ва муваффақиятҳои боз ҳам бештар орзу менамоям.

Бигзор ҷавонони Тоҷикистон ҳамеша ҳамчун ҳомиёни истиқлол, посдорони ваҳдат, чароғдорони илму маърифат, ҳомиёни арзишҳои миллӣ ва созандагони фардои дурахшони Ватани азизамон пешсаф бошанд!

Рӯзи ҷавонони Тоҷикистон муборак бод!